Museet vart grunnlagd i 1924 for å redde dei gamle husa på garden Leksvol frå forfall og riving: 2 stugu, loft, stolphus, sauestall, grisehus, fjøs, låve, hestestall og eldhus. Den eine stugu vart brukt som tingstugu frå 1671 til 1730. Tre hus vart seinare flytta til tunet: badstugu frå Rudningsdokken i Torpo, kvernhus frå Torsteinsrud i Leveld, og smiu frå Stave i Nedre-Ål.

Museet har etter kvart skaffa seg fleire hus, som er sett opp i bakkane ovafor gardstunet: eit stolphus frå Kvinnegard og eit frå Myren, 3 våningshus (ei større stugu frå Bakka på Strand, ei loftstugu frå Jøta og ei langstugu frå Settungsgard). Dessutan er det skulestugu frå Skattebøl krins (brukt 1872-1929), loft frå Holto og eit svært lite hus som var bustadhus ei stutt tid før det vart blekkslagarverkstad. Bakkestugu og Settungsgardstugu er rosemåla av Nils Bæra, medan fyrste høgda i Holtoloftet er rosemåla av Herbrand Sata.

Lenger oppe er det stølshus: stølsbu frå Tune-Fetjastølen, fjøs og lu (løe) frå Vieren, lu frå Øyestølen på Veståsen, og ei nybygd steinbu. Heilt øvst er det hus frå ulike husmannsplassar: stugu og bu frå Kolbotn, seinare Sutøy (ein plass under prestegarden), fjøs frå Haugerud i Skattebøl og låve frå Høgdehaugen (ein plass under Sata).